Pra la stazion de Persenon ie piëi via i lëures per la restruturazion nueva dl areal dla stazion. Sota la direzion dla STA- Strutures de trasport dl Südtirol Spa vëniel tlo crià lueges da lascé la rodes, plazes dai auti y fermedes dla curiera defin inuvatives.
Cun 750.000 cunvalidazions tl 2019 ie la stazion de Persenon, do Bulsan y Maran, la stazion dl Südtirol plu nuzeda. Do na fasa de proietazion plu longia, do che n ie unic a una cun la sozietà de gestion dla rë dla linies dla ferata RFI y tres l cofinanziamënt dl fonds europeich per l svilup regiunel EFRE vën dut l raion dla plaza dan la stazion śën restruturà per n fé dainora n zënter de mubiltà modern.
Aldò dl moto “mudé mesun saurì” vën duta la spersa cun i troies d’azes strutureda a na maniera che i nuzadëures ebe na bona sëuraduda y che la sibe da nuzé saurì. La mubiltà cun la roda ie te chësc cuntest n pont zentrel: Dala belau 1.000 lueges da lascé la rodes sota tiera ie la plataformes dla ferates da arjonjer diretamënter y saurì. Oradechël vëniel crià ntëur n 200 lueges per i auti, danter chëstes nce lueges y seves da ciarië per veicui eletrics. Ntëur n 40 lueges per motores y scooter coche nce 16 posć da parché a tëmp curt ie na ufierta de njonta. La fermedes dla curieres nueves vën struturedes da nuef y atrezedes cun njins de nfurmazion per i passajires nueves.
Pervia di lëures ie la plaza per i auti da dant stluta, tla Feldthurner Straße iel per ntant da garat doi sperses per i auti provisores, d’autra puscibilteies de lascé i auti ie sun la plaza dai auti Max. La fermedes dla curieres resta per ntant mo coche les ie sun la streda dla stazion.