Al é jü feter düt bun, val' cossa vëgn ciamó miorada – insciö ciarera fora cun le trasport di scolars n'edema do le scomenciamënt dla scora tl tëmp dl Covid-19. L'Ofize por le trasport de porsones y les scores s'á organisé damperfora y por les scolares y i scolars éra intant insciö: se vistí la maschera, sté dainciará, se lavé les mans.
Tres entrades graduales, en pert insegnamënt online, sciöche ince tres l'adoranza de bus surapró sön tröpes linies tratan i tëmps zentrai, éra jüda da partí sö bun le numer di passajiers y n pü’ da le smendrí, a na moda da schivé n afolamënt. Bele dal pröm de de scora, ai 7 de setëmber, vëgnel metü a desposiziun por i „tëmps critics“ o cer dis bus surapró sön les linies 182 y 185 Blumau/Steinegg/Tiers, la linia 211 Marling – Algund, la linia 241 Platt – St. Leonhard, la linia 325 Lijun – Porsenú, la linia 331 Tlüses – Funes, la linia 350 ti toc Runggaditsch/Sëlva/Pruca – Urtijëi, la linia 351 Tlüses – Laiun, la linia 401 Porsenú – Mühlbach y la linia 460 sön le toch Badia - La Ila.
Ti ultimi dis él gnü renforzé y adaté ai bojëgns les linies dl bus 201 Maran – Balsan y 110 Leifers – Balsan; pro d'atres linies vëgnel ciamó controlé le numer di passajiers por alzé sce al vá debojëgn les capazités, tan inant che ara vá aladô dles ressurses danman. L'Ofize Trasport de porsones ciara, dantadöt te raiuns rurai sciöche ince por les anuzadësses y i anuzadus dla ferata dla Venosta, da se la fá fora ciamó damí cun les scores por fá jí miú a öna i orars de entrada graduai cun la frecuënza di mesi publics.
Sön les atres linies dla ferata é cina sëgn le numer de che che s'un anüza partí sö bun; al pé che l'organisaziun nöia di tëmps d'insegnamënt dantadöt tles scores altes vais bun.