De gragn laurs ti tuní dla ferata se ghira n’interuziun dl toch dla ferata Maran -Töll cina bonamënter d’isté dl 2022.
Al vëgn lauré inant dassënn pro l’eletrificaziun dla ferata dla Venosta. Ai adatamënc dl’infrastrotöra y ala segurëza dl trafich dla ferata y ti tuní ti vëgnel dé na gran importanza. Sëgn él da fá laurs de costruziun y manutenziun ti tuní dla ferata de Josefsberg y Töll, che mët man ai 22 de novëmber dl 2021 y döra cina d’isté dl ann che vëgn. Le tunel de Josefsberg vëgn deslarié y adaté ai criters europeics por ci che reverda la segurëza ti tuní. Daite tl tunel vëgnel danterater fat n tru cun stangia da se tigní, che dess garantí na majera segurëza tl caje de evacuaziun. Tratan la stlüta vëgnel fat sot la direziun dla STA – Strotöres de trasport dl Südtirol SA - ince laurs de manutenziun pro la strotöra dles scines, che vá debojëgn en conscidraziun di laurs de eletrificaziun y dl radoplamënt dla capazité coliada impara che vëgn.
Sorvisc de sostituziun dla ferata da Maran a Töll
Le toch dla ferata Maran – Töll romagn stlüt tratan i laurs, impede la ferata vál le bus. I bus vá dala staziun dla ferata de Maran ala staziun dla ferata de Töll zënza sté chic, por che ara vais da jí da n post al ater le plü debota che ara vá y por garantí i coliamënc tles döes staziuns dla ferata.
Tles staziuns dla ferata de Algund y Marling ne stá le bus nia chit, ajache al é bele i bus dles linies 212, 213 y 217 che s’archita iló. La linia dl bus 212 vá da sëra ciamó trëi iadi surapró danter Maran, Algund y Marling, a na moda che ara vais ince da sëra da rové a ciasa cun i mesi dl trasport publich.
Dadoman adora vá indöt trëi di cater bus de sostituziun naota ala –staziun dla ferata de Maran y spo inant diretamënter al zënter scolastich Luis Zuegg, a na moda che le scolares y i scolars röies a scora por tëmp y ora. Chisc bus pëia ia dala staziun dla ferata de Töll dales 7.23 y röia dan la scora L- Zuegg dales 7.43.
Avis: Sön i bus de sostituziun n’él nia n aparat da convalidé. Che che tol le bus é porchël perié bel da colvalidé la cherta o l’abonamënt te staziun denanco senté sö. Al vëgn metü sö n aparat de convalidaziun sön la plaza dan le sotpassaje dla ferata a Maran. Implü vára sëgn ince da convalidé le Südtirol Pass y l’Euregio Family Pass online cun le smartphone denanco pié ia.
De pices mudaziuns pro l’orar dla ferata dla Venosta
Sön la trassa da Töll a Mals vá la ferata inant sciöche denant. A na moda da garantí i coliamënc sides a Maran, che ince pro la staziun dla ferata a Töll vëgnel sposté n pü’ l’orar de partënza de n valgönes ferates dla Venosta pian ia dai 22 de novëmber.