L abo+ per l ann de scola che vën possa bele śën unì damandà. La bona nutizia: online vala śën mo plu aslune.
Canche la scola scumëncia inò ie suvënz dut n pue’ da rëscia: ntëur n 80.000 abo+ per sculées y sculeies y studëntes y studënc vën damandei o renuvei online tl tëmp de mé puecia enes. La cunseguënza: i sistems de dac ie datrai sëuraciariei y daviadechël ie la dumandes d’assistënza pra l zënter de servisc y nfurmazion di Infopoints truepes.
Perchël se paiel a fé abenëura o miec bele śën la dumandes o i renuvamënc per i abo+ per l ann de scola che vën 2021/2022. Iust a drët per la sajon che vën ie duta la pruzedura online sun la plata web unida scurteda y scemplificheda. L plu debota vala per chëi genitores che renuvea y paia i abunamënc de si mutons/mutans dal cont de nuzeda y tres SEPA Direct Debit. Iló ne iel de bujën de degun dac y de degun numeri dl abunamënt: cun puec clics vën la validità dl abunamënt abo+ slungeda automaticamënter de mo n ann. Ma nce zënza cont de nuzeda ie la dumanda o l renuvamënt online dl abo+ plu saurì che l ann passà.
N cont dla validità: i abo+ esistënc possa te uni cajo unì adurvei nchin ai 15 de setëmber. Cun l slungiamënt online y cun l paiamënt dla chëuta anuela vën l abunamënt respetivamënter slungià de n ann. I abo+ per sculeies/sculées dla scoles elementera, mesana y auta che vën ti tëmps che vën per l prim iede damandei da nuef possen jì a se tò dai 1 de setëmber 2021 tla scola curespundënta y adurvé do l paiamënt dla chëuta anuela per i viages cun la curiera y la ferata dl trasport publich local.
L slungiamënt anuel di abo+ y nce la dumandes nueves vën fac sciche nchin śën mé online sun la plata web y possa unì dejëuc sibe cun y sibe zënza la tle digitela d’azes (SPID o cherta servijes ativeda cun letëur).
Bon a savëi: Per i abo+ di studënc/dla studëntes iel da chëst ann n regulamënt nuef. La nfurmazions n chësc cont unirà dates ora tosc.