L trasport di sculeies vën adatà ai bujëns a na maniera flessibla. Duc i orars de viac atuei ie da abiné online tlo sun südtirolmobil.
Per la mubiltà publica ie l scumenciamënt dla scola uni ann na ndesfideda particulera, ajache l ie da urganisé l trasport per milesc de mutons/mutans y de jëuni/jëunes y de adaté i orars de viac al numer de sculeies y al’ëures de scola de uni istitut de furmazion singul.
Pervia dla mesures de segurëza n droa possen nce inant mé se nuzé dl 80 percënt dla capazità di mesuns de trasport publics. “Perchël metons a despusizion 80 curieres sëuraprò per sculeies te dut l Südtirol. Ulache l ie de bujën, vëniel riesc cumedà do“, spiega l assessëur provinziel per la mubiltà Daniel Alfreider, che cunsieia a sculeies y genitores de se nuzé dla app südtirolmobil. “I orars de viac y i viages per i sculeies vën tresora atualisei. Nscila pudons for inò adaté i orars de viac dla curieres per i sculeies a na maniera flessibla y i orars che vel ntan dut l ann ne se muda nia”, dij Alfreider. La curieres sëuraprò possa, nia coche ntan l ann passà, unì nuzedes da duc i passajieres y l ne ie deguna trasses spezieles. I viages per i sculeies ie mé da abiné online tres la app o sun la plata web, sun la tofles di orars de viac y ti sfueies stampei ne iesi nia laite ajache l trasport di sculeies vën for inò adatà ala dumanda atuela.
Curieres y ferates: ublianza de mascra y capaziteies al 80 percënt
Per duc i passajieres dai 6 ani insù vel l’ublianza de tré sëura na mascra chirurgica ti mesuns de trasport publics, y nsci ënghe tla curieres per sculeies. Leprò toca nce i servijes per l trasport de sculeies. L vel inant la recumandazion de adurvé na mascra FFP2. La capaziteies mascimes che possa unì nuzedes te curieres y ferates ie dl 80 percënt. Per la curieres regiuneles uel chësc dì che duc i posć da senté possa unì nuzei. Mplu possel unì nuzà i posć da sté mpe nchin che l vën arjont l lim de capazità dl 80%. Pra na curiera de zità (o da lesura) possa chësc ënghe vester plu de 50 posć da sté mpe.
Ferates: manco passajieres pervia dl homeoffice
La capaziteies arbassedes al 80 percënt vel nce per ferates regiuneles. “Tlo ne iel nia puscibl mëter a despusizion ferates sëuraprò“, dij Alfreider. Truepa persones che lëura se nuza for mo dl homeoffice, n pert plu iedesc al’ena, nsci che l numer de persones che va a lauré cun la ferata uni di ie al mumënt tlermënter sota l livel dl ann 2019. Tla Val Venuesta uniral metù a despusizion curieres sëuraprò ntan cërc dis.