La cherta per n di “Euregio 2 Plus” ne vel n chësc d’instà che vën nia mé plu sciche cherta de grupa per duc i mesuns de trasport publics te duta la Euregio, ma nce sciche cherta vantaje per n viac tl tëmp tres plu de 60 museums te duta la Euregio.
Trueps aspieta cun despazienza lessù: do i lockdowns lonc di mënsc passei puderan nce tosc inò fé jites cun la curiera y la ferata tla provinzies y regions ujines, per ejëmpl cun la cherta per n di “Euregio 2 Plus” che ie unida piteda per l prim iede d’instà dl ann passà sciche scumenciadiva deberieda di paejes dla Euregio Tirol, Südtirol y Trentin. Menadrë tl Südtirol iel unì vendù ti mënsc de agost, setëmber y utober plu de 3.000 de chësta chertes. Al priesc de 39 euro à cun chësta cherta doi adulc acumpaniei da al plu trëi mutons/mutans sot a 15 ani la puscibltà de furné ncantëur te duta la Euregio cun la curiera y la ferata.
Per l 2021 à la Europaregion cherdà ora n ann di museums cun l slogan “Trasport – Transit – Mubiltà” y prugraman leprò de plu azions. Te chësc cuntest vel la cherta “Euregio 2 Plus” chësc d’instà ora de chël nce sciche cherta vantaje per plu de 60 museums y abinedes te duta la trëi pertes dla Euregio. Canche n mostra ca la cherta giapen per duta la grupa n arbassamënt dl priesc standard dl viac dl 50 percënt. La lista di museums che fej pea ie tlo https://2021.euregio.info/museen
Plu inant unira mo fat al savëi deplù nfurmazions y dates. Per ntant ëis mo dl’aurela de mëter adum na pitla blota grupa per la jita tres l’Euregio cun la vijita de n museum y per prugramé dut a puntin. Tlo ie i orares dla curieres y dla ferates per l Trentin (www.trentinotrasporti.it) y per l Tirol (fahrplan.vvt.at)