Passa 5.500 pendolares y pendolars ciafa chësc ann n bonus sciöche picia refata dles intardiades y dles ferates regionales tomades fora dl 2022.
Ci é pa le bonus di pendolars y dles pendolares?
Sce al é sovënz intardiades o sce al toma fora na ferata mëss les impreses dla ferata paié straufunghes de contrat; chisc scioldi ti vëgn dá inant dala Repartiziun provinziala Mobilité ales pendolares y ai pendolars atocá sot forma de bonus.
Che á pa le dërt da ciafé le bonus?
Le bonus ti vëgn paié fora ales pendolares y ai pendolars che vá regolarmënter cun les ferates di gesturs locai Trenitalia y SAD. Le bonus vel por chi mëisc olache al é gnü tut altamo 30 iadi la ferata cun le Südtirol Pass o l'Euregio Family Pass.
Ales porsones cun le Südtirol Pass o l'Euregio Family Pass ti vëgnel acredité le bonus por pendolares y pendolars dai 22 d'aurí dl 2024 inant. L'import vëgn metü pro le credit romagnënt sön chertes prepaid o trat jö dal proscimo cunt dl Südtirol-Pass che an ciafa da paié.
De tan é pa le bonus?
La soma mascimala che vëgn paiada fora é de 65 euro. Indöt ciafa 5.502 porsones le bonus por pendolares y pendolars 2022; al fej fora indöt 284.845 euro.
STA/Manuela Tessaro